Posts

New post

شعر لری بختیاری به خط لری پاپریک از مسعود بختیاری

 اٛی خوڌا بال بوم بڌه اٛی خوڌا بال بوم بڌه جۊر کَمۊتر برڤوم بال اۉشنۊن اٛیلاخ چال تَر اٛی خوڌا بال بوم بڌه تا بزنوم بال برڤوم بال اۉشنۊن ئی مال و اۊ مال آخی وای هم تا قیامت اٛی خوڌا بال بوم بڌه تا بزنوم فِر برڤوم بال اۉشنوݩ ئی دِر و اۊ دِر اٛی خوڌا بال بوم بڌه دو بال إسبی برڤوم بال اۉشنوݩ هر جا که غم نی برڤوم هَر جا که غم نی چه خۊئه مالا وَنن مؽن مَرغزاری کومیت‌چاله زین کونی بازی دِراری کومیت‌چاله زین کونی بَری به یورغه لَغومه طلا گِری، نالاسه نورغه قالیا نه فَرش کونی همه یَک ٱنداز میشکاله بوگوئی هوف کون مؽن ساز قالیا نه فرش کونی یَه لا ۉ دو دو لا میشکاله بوگوئی هوف کو به کَرنا

شعر لری بختیاری به خط لری پاپریک از مسعود بختیاری

هیاری كور ڤوری گۉ دی ڤوری شۉ وه كمينه مَر گمونت كَڌ بستݩ صۉ تا پسينه هَر كی عاشق بۊ شۉ و رۊ خۉ نڌاره تَه سۉار قافله كِی اينشينه... آسمون تَش نها به صحرا اونه إسۊسه نَرمه بارونی ايخو خاكه ببۊسه كور جغله‌يَل نه خَوَر كو كه جم آبۊن تا بِوازيم هم ز نۊ هَل‌هَله كۊسه... بنگ بوكو تا كه پيايَل بيان هياری آخه مال رَه بار وَنه جا وارگه پاری وا دی ٱمشۉ تا خورۊس‌خۊن دۉر یَک بۊيم تا درا ٱفتۉ بيا رۊز وا دياری... دور تو هم وا كو تَشه ديلَق به پا كو ٱر کومَک ايخوی ڤوری جار و هيا كو دورگله جم كو وابا خوت دۉر چاله هيوه بيارين بَچه‌یَله ديندا نيا كو...

شعر لری بختیاری به خط لری پاپریک از مسعود بختیاری

 یاریار هَرچی یاریار ایکونوم یاروم نیڌه پِیڌا نوموراڌی سی خومه که‌ مَندوم خومه تِئنا شۉ مَه و بال رۊ خیلی دلنشینه مو که یاروم ایچو نی دلوم پور ز خینه عاشقی مو ز خوته غمت چه شیرینه هر کَس که عاشق نبۊ کلت نی‌نشینه عاشقی مو ز خوته غما چه گرونه هر کس که عاشق نبۊ قَردته نڌونه

شعر لری بختیاری به خط لری پاپریک از مسعود بختیاری

  شۉخیݩ چار سۉار چی گونج شؽر وِینه دَم تَش صیڌال بَک و مَندنی، فَرهاڌ جوݩ‌بَخش چار سۉار چی گونج شؽر به خوڌا وِینه دَم دی صِیڌال بَک و مندنی، فرهاڌ و هاڌی ٱندکا موڌوم بوهار به خوڌا چَشمه بونه جاز دَستته ماری زنا اۊستا توفَنگ ساز دَستته ماری زنا توفنگ نسازی مون بۊر هَف تیره خَرد دِروَی به بازی آ صِیڌال درۉ بکَش دۊئال تَنگه نومدار خوݩ ز نۊ نها بوناڌ جنگه آ صیڌال درۉ بکَش دۊئال زینه نومدار خوݩ ز نۊ نها جنگ پسینه

شعر لری بختیاری به خط لری پاپریک از مسعود بختیاری

  چی چشمه بِوین حالا دست به یَک داڌن جۊن سی یَک داڌن چَندی آسونه بوین حالا وَختی وایَک بۊیم روندن دشمݩ چَندی آسونه دیه شۉ تاریک سی دیڌن سو تی به رَه مَنشیݩ ایبرت خۉ حالا ایتَری دی نگو نتَروم خوت‌ ڤوری بڌرۉ گۉ چی ٱفتۉ بیۉ که وابایک یه عَئڌی بۊوَندیم حالا که مون و تو چی خین یکیم نَوا بنشینی مو که ایوِریستوم حالا که مون و تو ستین یکیم دیه شۉ تاریک سی دیڌن سو تی به رَه مَنشیݩ ایبرت خۉ حالا ایتَری دی نگو نتَروم خوت‌ ڤوری بڌرۉ گۉ چی ٱفتۉ تو چی ٱفتۉ خوت ڤوری بڌرۉ چی چشمه وا بۊی نه چی گۊرۉ دیه شۉ تاریک سی دیڌن سو تی به رَه مَنشیݩ ایبرت خۉ حالا ایتَری دی نگو نتَروم خوت‌ ڤوری بڌرۉ گۉ چی ٱفتۉ

شعر لری بختیاری به خط لری پاپریک از مسعود بختیاری

 برزیَری کَن‌کَن مالا دلوم رَئڌ واباسۊن بیۉ بریم زال بزنیم جا وارگه‌ئاسۊن کن‌کن مالا دلوم رَئڌ به دینسۊن بیۉ بریم زال بزنیم جا وارگه دۊش پَسینسۊن اٛی شومال باڌ اٛی بیۉ برَس به حالوم ٱفتۉ مول به کَمَر سوئڌه پِرک و بالوم اٛی شومال باڌ اٛی بیۉ برس به داڌوم خَوَری سی مو بیار تا بکونه شاڌوم یکی نه ایخاستوم بیڌاڌه بخونه بکَنه خار ز دلوم گول به جاس بنشونه کَی خلاس ایبۊم ز ئی مات گندوم وارَستن برزیَروݩ مو په سیچه مَندوم میر مات بَنگ ایزنه غله مَند سَر پا داسته تون تون بکَش نمَئنی به گرما برزیَر نۊ برزیر چَپه‌ت نتَنیڌه داسته تون تون بکش غَله مَند نچیڌه

شعر لری بختیاری به خط لری پاپریک از مسعود بختیاری

 وار نۊ گرمسیر گرمه، گرمه و باڌ گرم ایاره کاشکی که زی تر مال بار کونه بریم اٛیلاخ دۊواره گرمسیر، گرمه بیۉین بار کنیم بریم سی سرحڌ بزنیم یه وار نۊ بؽهلیم ئی کوئنه واره کوئ زرده نه بوگوین کردیمه گردواری تی به رَه بۊ تا مالا بیان ز آسماری کوه زرده نه بوگوین مَندیرمون بۊ گردواری کردیمه پاک وابا مَهِ نۊ کوئ زرده نه بوگوین کۉگس بخونه سَر چارده نوم خوڌا دی مال کَنونه کاشکی که یه سال مالا وَنن پا چشمه ساری هر کسی بره سو تا پسین به دین کاری کاشکی که یه سال مالا وَنن وار برَفتۉ هرکسی بره به دین کاری إز سو تا سر شۉ شۉ یه تَش تونگی بزنیم ز هیوه کَلخونگ میشکاله بوگوین بوگوین منشینه بیڌونگ شۉ یه تَش تونگی بزنیم ز هیوه بایوم میشکاله بوگوین بوگوین هوف کونه دایوم بیۉین یه تش تونگی بزنیم دۉرس بوڤازیم میشکاله اٛی هوف کو به ساز همه مَندیر سازیم